الشعب يقدم نص مليار للجبهات والمؤتمر يصرف ٢ مليار لترميم مبنى اللجنة الدائمة !!!
بقلم #زيد_الغرسي
ابناء امانة العاصمة قدموا قافلة لدعم الجبهات بأكثر من نصف مليار ريال ..
والمؤتمر باع ارضية ” قيل انها تابعة للدولة ” باثنين مليار مش للجبهات لااااا ؛ لترميم مبنى اللجنة الدائمة في صنعاء !!!…
يعني الناس بيواجهوا العدوان ويقدموا القوافل ؛ وهم عندهم اهم شئ ترميم مقر الحزب ؛
ويجي يقلك هم بيواجهوا العدوان ؛ اينه مدري !!!
ولا قد ابسرنا لهم حتى قافلة واحده من اول العدوان حتى الان …
وفوق هذا تشتغل الخلايا حقهم انتقادات لانصار الله ليش ما تبسروا الفقراء والمساكين ؟ وليش بتعملوا كذا وكذا وبه ناس جاوعين ؛ لكن هم يصرفوا المليارات لترميم مبنى عاااادي ! ماعاد بش فقراء ولا مساكين …
بل الادهى انهم صرفوا حق الترميم مرتين ونهبوه كما اعترف بذلك ابو راس ؛ يعني وعادهم بينهبوا حتى حقهم ويقلك الانصار فاسدين ؟؟
مع ان انصار الله هم الوحيدين الذي بيبذلوا جهود كبيرة لتخفيف المعاناة عن الفقراء والنازحين ومؤسسات الانصار عملها معروف …
عاد ادي لكم الطامة الكبرى !!!
قالوا يشتوا يراجعوا يخرجوا مخصصات الحزب من وزارة المالية !!
طيب لمن ؟
قالوا للحزب ؟
طيب انتوا عارفين مابش ايرادات ولا به ميزانيات للكثير من الوزارات الا الفتات وهي اولى من الحزب ؛ ومعانا جبهات تشتي دعم ؟؟!!
يقلك لاااا اهم شئ الحزب !! طيب اين الوطنية الذي بتدعوها ؟!
على الاقل ادوا للحزب من استثماراتكم واموالكم التي نهبتوها من اموال وثروات الشعب خلال عشرات السنوات من حكمكم !!!
وخلوا انصار الله يكافحوا بالقرشين الذي بتقع في دعم الجبهات وتسيير مؤسسات الدولة بالحد الادني ويصرفوا نص معاش كما قد جمعوا شويه زلط …
وعاد فوق كل هذا ؛ تجد عناصرهم الموظفين في مؤسسات الدولة متذمرين وساخطين وشغالين تحريض وتشويه لانصار الله ليش ما بش مرتبات !!
طيب على الاقل استحي وخلي عندك دم وقع ادمي ولا عاد تطالب بمخصصات الحزب ؛ لكن تطالب بصرفها وتخرج تحرض ليش مابش مرتبات فهذه موغاده ووقاحة …
اهم شي عندهم الحزب وطز في الوطن وطز في مواجهة العدوان !!
يعني رجعوا نفس سياسة الخائن عفاش ..
عيضايقوا لكن ما اسوي لهم ؟! هي الحقيقة و الواقع …
#نحن_في_اقتحامات_وليس_انتخابات
#زيد_الغرسي
