مواصفات قوازي عفاش في مؤسسات الدولة

…

بقلم / # زيد_ احمد_ الغرسي

▪ ما يقوم بتنفيذ الاعمال الهامة والرئيسية والاساسية التي ستغير الواقع الى الافضل او ايجاد حلول استراتيجية لمعاناة الناس واصلاح اخطاء الماضي بل ولا يهتم بها بينما تجده ينفذ الاعمال الهامشية والتافهه والعادية والصغيرة ؛ وهو بذلك يجمد العمل الرئيسي ويوقف عملية البناء والتصحيح ومكافحة الفساد …

▪ اذا في توجيه من السيد القائد او الرئيس في قضايا هامة واعمال مهمة جدا ؛ تراه ما ينفذها بالشكل المطلوب بل يفرغها من محتواها وينفذ شكليات او ينفذ منها شئ بسيط جدا لا يصل فيه الى صلب العمل نفسه ؛ او يفعل فعالية او نشاط معين ويقول خلاص نفذنا التوجيه ؛ او يجلس يماطل لما يتوهك وتنسى ذيك التوجيه ؛ او يخلق امامك عراقيل ؛ احنا نشتي ميزانية مدري كم ومابش ميزانية ؛ وهذا ما عنقدرش لانه وانه ؛ ويستغل العدوان لتقديم اعذاره ويقلك احنا في عدوان ما نقدر نعمل هذا كله وانتوا عارفين ما فعل العدوان …الخ وكم يا عراقيل ؛ او يرفع تقرير ان كل شي تمام وتم التنفيذ في الورق بينما الواقع ولا حاجه الا شئ هامشي ….

▪ يحرص على ان يحضر معك كل الفعاليات ويرفع الصرخة بحماس اكثر منك وعنده همة اكثر منك لاجل يثبت لك ان قدوه من الانصار حتى توثق فيه وتصدر له قرار ؛ وبعد عينك ما تشوف الا النور
يشتغل ضدك وضد المجاهدين ويشوه سمعتك ويحرض الموظفين عليك ؛ ومن تحت لا تحت يحاربك ؛ وقدامك يجاملك ويمدحك اين انت وين ….

▪ البعض منهم يجمد كل الاعمال بتعمد وما يمشي العمل الا على ما تقله انت ؛ واذا ما حركته وتابعته ما عيفعل ولا حاجه ؛ وكأنك بتطلع واحد جبل من خلفه اذا فلت له عيسقط ؛ واذا فعل عمل ما ينجزه الا وقد اتعبك متابعة وطلع روحك ؛ وبعض الانصار يحسب انوه ضخم بيمشي الاعمال ونسي انوه بيضحك عليه وما بيمشي الا اعمال عادية بينما الاساسية والهامة والكبيرة مجمد لها …

▪ يجلسوا حول ذيك المسئول من انصار الله ويعزلوه عن الواقع وعن النزول بين الناس ؛ وعزايم غداء وتخازين جمعه ويمكنوه مدح وتطبيل و انت باهر وانت يا استاذ احسن واحد ولو انصار الله ساعك انحنا في خير لما تشبي نفسه وماعاد يشتي الا هم يجالسوه ومن انتقده بصدق واخلاص وهو مؤمن يبعده منه الف قدم ساع القاطرة وقده يكرهه ويحاربه وبعدها خلاص يمشوه بطريقة غير مباشرة ويتحكموا به هذا صح وهذا مخالف للقانون …الخ

▪ اذا به مشكلة او تقصير يختفي عن الانظار ويحرك قوازيه يحملوا انصار الله المسئولية ؛ ليش ؟ يقلك هم ماسكين الدولة !! واذا به انجاز او تنفيذ مشروع او عمل معين ما تبسر الا وهو الاول امام الكاميرا لاجل يبرز الانجاز لنفسه ….

▪ اذا به معاملة ما يمشوها الا اذا كانت على ما يشتوا هم و يسبروها لك بالقانون ؛ وانها لمجاهد اوتدخل فيها واحد من انصار الله او لمواطن عادي يمكنه مطمطه وعراقيل ويديلك مبررات انها مخالفة للقانون ويجلس يلعب بذيك المسكين يوميه سيره جيه للمعاملة ولا نتيجة لما يعقده ؛ ويرجعوا التهمة فوق انصار الله ؛ ما رضيوش يمشوها ؛ هم قالوا نوقف مثل هذولا وووالخ …
المهم عندهم خبرة اربعين سنه في اللف والدوران وايجاد الاعذار وكله بالقانون فما يشتوه عيمشوه بالقانون والذي ما يشتوه عيعرقلوه بالقانون ؛ ومسئول الانصار مقعي ماهو داري ما يفعل ولا يشتي يقرى ويفهم القانون واللوائح …

▪ اذا كان وزير او محافظ يحارب الوكلاء او المدراء الذي من انصار الله واذا كان مدير يحارب الموظفين المجاهدين ؛ ويخلق عقبات امامهم ويبعسس بعدهم على اتفه الاشياء ؛ لاجل يغيرهم او يوقفهم او ينقلهم ويدي بدلهم ناس كانوا معروفين بتاريخهم انهم عفافيش ؛ واصحابنا ما يقصروا يبعدوهم بسرعة البرق لكن اذا اشتكى انصاري من مؤتمري يقلوا له اصبروا عليه ….
او ينذق فوقهم الاعمال لاجل يفشلهم ويقل شفتوا ما فعل شي او تجي لاعنده وتقله اين المعاملة او ما فعلت يقلك ما رضيوا انصار الله يمشوها ويرجم لافوق انصار الله لاجل يخلق سخط على ذيك المسئول الذي من انصار الله …

▪يسعى الى خلق مشاكل بين مسئولي انصار الله انفسهم في نفس الجهة ؛ ويشتغل هو ومجموعة من اللوبي حقهم ؛
ساعه يسيروا لاعند ذيك ويقلوا صاحبك مدري ما فعل وهو وهو لما يوغروا قلبه ؛ وبعدين يسيروا لاعند الثاني ونفس العملية ؛ ما تبسر الا وقد مسئولي انصار الله مختلفين ومحترشين ضد بعضهم البعض وهذولاك مكيفين وبيضحكوا من بعيد …

▪ وبعد هذا كله يحركوا الطابور الخامس حقهم لتشويه انصار الله وشن الشائعات ضدهم ومحاولة خلق سخط ضدهم بانهم بيعرقلوا الناس وان مابش دولة وانهم ما يقدروا يحكموا ؛ ويمكنك اقتراحات ليش ما يفعلوا انصار الله كذا وليش ما يسبروا كذا ؛ ( وهم الذي بيعرقلوا ) واذا حد تحاكى عن فساد او تقصير في عمل يردوا عليه احنا في عدوان وعمموها في اوساط الناس ونسبوها لانصار الله ….
▪طبعا نجحوا في احتواء البعض وافساد البعض واقصاء وتهميش البعض واختراق البعض الا

خر ؛ والسر وحدتهم وتكاتفهم على باطلهم فهم لوبي منظم وذو خبره بينما انصار الله متفرقين ومشتتين ومختلفين وسطحيين ومن صمد منهم قد قلبه عيقرح …
فلذلك يشتحطوا ويترجلوا ويكونوا منتبهين وواعين باساليب المنافقين القذرة …

▪ اخيرا سمعتوا رئيس وزراء لبنان عندما قدم استقالته ايش قال ؟ قال جينا نحارب الفساد ووجدنا ان لوبي الفساد اكبر من الدولة وشنوا علينا حملات اعلامية وشائعات وشوهونا امام الناس … نفس ما بيفعلوا عندنا لان المحرك لهم واحد وهو السعودي والاماراتي ومن خلفهم الامريكي …….
#زيد_احمد_الغرسي